ثورة إلا ربع

الحق يتقال، النظام المخلوع ده كان دمه زي العسل وعلمنا أداب المعارضة صح الصح. تشتم الوزارة ماشي، تجيب سيرة الريس لأ. تنادي بتغيير ماشي، تكون جبهة لأ. تدخل حزب الوفد ماشي، تعارض بجد لأ. تطلع في التلفزيون وتهلل ماشي، تنزل الشارع لأ. كل ده ليه؟ علشان نحس بنفسنا ونقول إحنا عندنا حرية. وفي نفس الوقت علشان يبقي عداهم العيب وقزح. وكله يفضل في التمام، الباشا الكبير علي العرش والباشا الصغير بيغرف ويوزع.

بس شوية شوية ابتدي النصب يزيد عن حده وطلعلنا دكتور إنما باش مهندس وأسطي بدرجة نوبل قلينا عيب عليكو دانتو خطوة وحتبيعوها خردة. فوقنا شوية وأخدتنا المروة وقولنا لأ مش إحنا اللي نتاكل أونطة.  شتمنا الريس فاتقبض علينا. كوننا جبهة إتلفئتلنا لنا تهم. عارضنا بجد حاربونا في أكل عيشنا. نزلنا الشارع ضربوا علينا رصاص. دخلنا سجون ومحاكم وشحتنا ودفننا اخواتنا وقلنا لأ مش حنرضي بقليلنا. هو احنا كنا عايشين والقاشية معدن أي نعم، بس تلاتة سلندر والموتور كان جايب زيت. زي اللي جايب ٧٥٪ في ثانوي ونفسه يخش طب. قلنا كفاية تلفيق وترقيع ومشي بالبركة، عايزينها سالكة. فاتكلنا علي الله وعملنا اللي ماتعملش ونزلنا الشارع وفورنا العربية كلها. ولا امتحانات ولا ملاحق. كله حيدخل طب يا باشا.

أصل المعارضة اللي احنا اتعلمناها كان كبيرها معارضة إلا ربع. واحنا فهمنا خلاص ان هو الربع ده اللي فيه الشفا. بطارية العربية بتبوظ لما يبقي فيها ربع ضارب مش نص. ٧٥٪ ماتدخلكش طب يا أستاذ. ياتعيد السنة وتشتري بطارية جديدة، يا تمشي بالزق وتخش تربية رياضية. ثورتنا بقة ما قامتش غير علشان الربع الضارب ده. والحمد ليك يا رحمن يا رحيم خلصنا من الباشا وابن الباشا بضربة معلم. ولا تقولي منتخب ولا غيره، شفنا أعلام تغطي توشكا وكلها في ميدان ما يجيش حوش في قصر مرات الباشا او مرات ابن الباشا.

رقصنا وغنينا لغاية ما صوتنا اتنبح. زغردي يا ام محمد، هللي يا ام جرجس. 

طلعنا أولاني في تاني فرحانين بالعمرة, وشوية شوية لقينا كاوتشة بتضرب وماشيين علي تلات عجلات. يعني طلعت طب بطري وانا مالياش في البهايم. ريس بيصيف وصفوت بيعمل حزب وسرور بيخاطب شباب الفيسبوك وعزمي فارش ملاية علي سرير القصر وبيبعت بلطجية علي جمال وحصنة. وبعد ماكنا فورنا العربية علشان الربع الضارب طلعلنا ميت ربع تاني وكأن المخروبة مالهاش دوا.

فراعنة بكاكي وتاتار بدقون بيبيعوا أونطة ويقولوا دستور.

علي العموم أديني واقف مستني ونش الحرية ييجي يشيل. 
ووحشني ميدان الحرية، ولا كان إسمه تحرير؟

بعد ما هربت من وطنية ديمقراطية طلعتلي ديمقراطية بالملوخية.

 والنبي يااخواننا انا بسأل وعايز حد يرد, هي دي ثورة بجد ولا ثورة إلا ربع؟