انسب توصيف للانسان المصري العادي هو نص ثوري علي ربع كنبة علي ربع فلول.
اتخض واستغرب يوم ٢٥، خاف واترعب يوم جمعة الغضب، شتم وانفعل يوم موقعة الجمل، حذر ومصمص شفايفه يوم جمعة القرضاوي، رقص وهلل يوم التنحي، اترسم واتفشخر يوم كنس الميدان. المصري العادي ده اتلخبط وتاه بين هتافات الجيش والشعب ايد واحدة، ويسقط يسقط حكم العسكر، انشكح من نجوم شباب الثورة، وبعدين زهق وقرف منهم، عيط علي الشهدا وقلبه اتقطع مع اغاني وكليبات الفضائيات، بس ما حاسش اوي او بطل يحس بآسي اهلهم من كتر ما جت سيرتهم، معترف بحق الاخوان في الاشتراك في الحياة السياسية بس مابيحبمش ومش عايزهم يحكموه ولا يقربوا منه، قرفان طحن من السلفيين ومكسوف يقول ليبقي حرام او عيب، عارف ان طنطاوي تبع مبارك بس عامل عبيط، كفران من حياته ومش لاقي حد يلومه......... غير الثورة.
المصري العادي ممكن يحبط وممكن يؤمن وممكن ينزل وممكن ينتقد الثورة والثوار. انا بقي مش مصري عادي. انا مندفع ومخلص لسة بدرجة ١٠٠٪ لثورة خلتني حاسس اني صاحب البلد بعد ما كنت عارف اني ماليش فيها، لثورة خلتني اضحك من قلبي واقشعر وابكي كله علشان بلدي، لثورة صحت شعب نسيت احبه واكتشفته في الميدان. انا مش عاطفي بس. ايوة شايف وعارف اني منحاز لثورة قلبت الدنيا بس ماستفتهاش بعض ما لخبطتها، لثورة قامت بس ما حكمتش، لثورة نفعت بس ماستنفعتش، لثورة حاضت بس ماخلفتش. والله ده مش عند. انا مصدق ومقتنع ان ثورتنا اتسرقت بس ما ضاعتش، اتركبت بس ماتروضتش، وحتي يا صاحبي ياللي بتقول يوم من ايامك يا مبارك لو ثورتنا اتقتلت، احلفلك انها برضه ماماتتش.
انا مش مصري عادي، انا عايش الثورة بقلبي وعقلي ووجداني. انا مش حالم ولا ساذج. انا مؤمن ومصدق وحالف. انا مقتنع ان مصر مش حتهدي خلاص تاني الا لو اتصانت وانا مبسوط وراضي باللي يحصلها. ايوة حاسس بآسي الغلابة اللي اتضروا منها، بس انا كنت حاسس بيهم وهما بيموتوا من قبلها يا عم المزايد. عارف ان التمن غالي، وان ولاد الحرام بيغلوه كل يوم، بس عن نفسي ناوي وحالف ادفعه ومش حاخلي حد يقهر ثورتي في قلبي.
كل مصري نزل من بيته بيهتف للحرية وما رجعش. كل ولد او بنت اتصابوا برصاص القمع وماتوا. كل مصري دهسته طاحونة الغدر. كل مصرية عرتها بيادات القصر. كل طفل صرخ وقال حرية واتشحن لاهله في نعش. كل واحد من دول دفع وانت يا نص ثورة نص كنبة نص فلول خلاص زهقت؟ انا مش ماشي ومش حاسيبها ومش حاسكت ومش حاطاتي. انا مصري زيي زيك ومش اخواني ولا سلفي ولا فلول ولا زفت. انا مصري عادي عايز مصر تبقي احسن بلد في الدنيا ولو ماعرفتش احقق مرادي فان شاء الله حاموت وانا باحاول.
بعد أن جري إفساد منظم وممنهج للتعليم طوال الثلاثين سنة الأخيرة وتفتيت مخطط لأي تجمع قومي ووطني منذ ثورة 25 يناير ، فلا عجب أن يصبح هذا الشعب الغالب عليه تعليم فاشل وثقافة متدنية فرضت علية وأدراك مفروض عليه قلة الوعي لإنشغال الإدراك بلقمة العيش وتضارب في المصالح الفئوية لقلة الموارد المطروحة بسبب النهب المنظم من رأس المال المسيطر وإطار من قوانين تم تفصيلها لصالح فئة صغيرة من المستفيدين ليتحولوا الي متحكمين في مقدرات الوطن والشعب . فلا عجب إذن في تضارب الرؤي وتعارض المصالح لدي المواطن ليظل في النهاية يدور في دائرة من السلبية المطلقة ويدخل في حال من الجمود ، في انتظار الذي لا يجئ من تلقاؤه أبدا .الحق و العدل والحرية
ReplyDeleteأصبح التحرك الإيجابي مطلوبا الآن