Saturday, April 12, 2014

جرجرة الجيش

كلنا بنحب مصر. وكلنا بنحب جيش مصر. وكلنا شايلين جميل كل واحد حمي مصر أو حرر مصر او فدي مصر. نقطة.

بس ده مايعنيش إننا نلغي عقولنا، ونصدق ونردد خزعبلات مضحكة، لمجرد ان مصدرها حد من الجيش او اللي بيقولها حد فاكر انه كدة بيدافع عن الجيش. مش ده اللي حيخلي البلد تستقر. ومش ده اللي حيرفع شأن الجيش. بالعكس تماماً علي فكرة.

اللي بيحب مصر وجيش مصر بجد ما يعملش مؤتمر اعلامي يعلن فيه ان جيش مصر اخترع جهاز بيحول الايدز لكفتة، قبل ما يتأكد من صحته ويكشف عليه ويجربه بدل المرة مليون، علشان ما يطلعش شكله وحش ويضحك الناس علينا.
اللي بيحب مصر وجيش مصر بجد ما يشوشش علي البرنامج الناقد الوحيد في التليفزيون المصري، فبدل ما يحمي الجيش وقائده يقوم يطلعه مرعوب من اي معارضة، وأكنه علي راسة بطحة ومضطر يسكت الناس علشان ما يتفضحش.
اللي بيحب مصر وجيش مصر بجد ما يقعدش يردد شعار ايد تبني وايد تحمل السلاح، ويصقف ويطبل مع كل مشروع يتعدي مهام الجيش، وهو مش فاهم ان طول ما الايدتين مش علي السلاح يبقي جنودنا حيفضلوا يموتوا لان قياداتهم مضطرين يشتغلوا مقاولين واصحاب مصانع وسماسرة وتجار.
اللي بيحب مصر وجيش مصر بجد ما يقعدش يدبدب برجليه علي الارض زي العيل اللي شبطان في لعبة وعمال يقول عايزها مالياش دعوة، ويفهم ان اصراره علي جرجرة الجيش لقصر الرئاسة قد يكون له تداعيات خطيرة جداً علي الجيش وعلي البلد.
اللي بيحب مصر وجيش مصر بجد ما يكرهش الناس فيه وما يقرفش الاحرار منه من كتر التطبيل المتواصل، وكأننا نحمي مخلوق هزلي لا يقدر علي مواجهة النقد والمصارحة والمكاشفة بدون حضانة من النفاق والتملق.

ومع كل ذلك، لو حضرتك – يا صديقي المتعلم المثقف – فهمت كلامي علي إنه تشكيك في حبك للبلد والجيش او انتقاص من وطنيتك، فأؤكد لك أن هذا أبعد ما يكون عن حقيقة ما بداخلي، لأني أعلم خير العلم أن القطة أكلت أولادها من حبها لهم، وأن الدبة قتلت صاحبها من ذات الدافع النبيل.

بس خلينا نتفق إن زي ما أنا لا أشكك في نواياك واخلاصك للوطن، فبرضة مش حاقبل ولا حأسكت، لو لقيتك بتحاول تفرض عليا أفكارك من منطلق إني لو ما رددتش ما أعلم أنه هراء، أبقي ما بأحبش بلدي وما بأحبش جيش بلدي. :-))

نشر ببوابة يناير بتاريخ 15 مارس

No comments:

Post a Comment