بعد يوم كامل في لجان الانتخابات - إديني عقلك

ممكن نسيبنا من الكذب والتطبيل والتغييب اللي بنشوفهم في التليفزيون علي لسان مؤيدي المرشحين شوية، ونتجاهل الهلس والهفلطة اللي بنقراها علي فيسبوك وتويتر حبتين؟ شكراً :-). ادوني عقلكم خمس دقايق بس لقراءة الآتي والتفكير فيه بجد من فضلكم. ولو عجبكم الكلام ارجو نشره ولو ماعجبكوش تعالوا نناقشه:

اللي انا شفته بعيني النهاردة في اللجان سواء في امبابة وارض اللوا، او في المهندسين والزمالك، هو ان ايوة طبعاً فيه سكر وزيت وتوجيه للناخبين، وايوة طبعاً فيه مال فاسد بيحاول استرجاع النظام السابق، انما الواقع برضه هو ان فيه جزء كبير اوي من الشعب منساق خلف خطاب ديني متشدد من غير رشوة، وان فيه جزء كبير جداً تاني من الشعب مصمم علي استخدام الديمقراطية للثأر من الثورة والثوار من غير ما يكونوا من الفاسدين.

الفضل في ده وده يرجع في رأيي للمجلس العسكري اللي برع في ادارة المرحلة الانتقامية اعلامياً وسياسياً واجتماعياً واقتصادياً وامنياً، علشان يخلي الكتلتين دول قوي رئيسية في العملية الانتخابية لإختيار اول رئيس جمهورية لمصر بعد الثورة. وحتي لو اختلفنا في تشخيصي لدور المجلس العسكري، فالواقع يا حضرات هو ان شفيق او مرسي ممكن جداً يبقوا حقيقة، وانا باقولكم انهم حيبقوا حقيقة بكرة، الا لو كل اللي مش عاوزينهم الاتنين اتصرفوا التصرف الوحيد اللي مايخليهمش يعيدوا مع بعض.

وهو ان العقلاء من الثوار وانصار الدولة المدنية يتخلوا عن عنادهم وتمسكهم بمرشحيهم بدل ما يقعدوا ينبحوا صوتهم عن التفتيت وماشابه، وهما مصممين علي تجاهل حقيقة بسيطة جداً جداً وواضحة جداً جداً، الا وهي ان فيه كتير اوي من الليبراليين مستحيل يدوا صوتهم لابو الفتوح، وفيه كتير اوي من الثوار مستحيل يدوا صوتهم لموسي، انما مافيش حد من الليبراليين او الثوار مستحيل يتراضي بحمدين كبديل عن الطرف الآخر. سيبكم من حوارات الناصرية وغيره لان لو الطوبة وقعت في المعطوبة بجد يبقي اي عيب في حمدين ما هو الا هامشي بالمقارنة بمصائب تنصيب شفيق اومرسي علي مصر.

وبناءً عليه فالتصويت لحمدين صباحي هو الخيار الذكي الوحيد من وجهة نظري البسيطة واتمني من كل قلبي ان كل اللي مانزلوش النهاردة يفكروا في الكلام ده كويس وهما نازلين بكرة. اتمني انكم تقروا الكلام ده تاني وتالت بالراحة ومن غير تحجر. 

اخيراً احب اضيف ان انا تعبت جداً من اللف اللي لفناه في كل انحاء القاهرة والجيزة النهاردة، انما انا مليان امل بعد اللي شفته من اقبال الناس المبهر والطبيعي من كل الاطياف علي اختيار حمدين. والله هو الشاهد علي صدق كلامي وخلاص نيتي.