مين بيهرج ومين بيفتت اصوات ومين بيشتريهم

طبعاً فيه قطاع كبير من المجتمع حينتخب مرسي وشفيق. 

بس انا باقولها من دلوقتي علشان ماحدش ييجي يحاسبني بعد كدة ويقوللي اني اشتركت وارتضيت بالديمقراطية وعليا تقبل نتائجها. لو حد منهم الاتنين جه رئيس انا مكاني في الميدان ومش حابطل ولا حاسكت ولا حارضي الا لما نسقط هذا الرئيس لان الثورة مش وجهة نظر ولا ركوبة، واللي ماتوا ما ماتوش علشان ننتخب اللي قتلهم ولا اللي باعهم.
 

اما بالنسبة للمعسكرين الآخرين فانا عاوزكم تقروا الكلمتين دول بالراحة من فضلكم لانها آخر محاولة ليا وبعدين حابطل اقاوح معاكم:
 

 احنا واقفين في النص وشايفنكم وفاهمينكم وحاسسين بيكم انتوا الاتنين. 

اصحابنا وحبايبنا الثوار اللي بيأيدوا ابو الفتوح عمالين يقولولنا ان تصويتنا لحمدين حيفتت اصوات الثوار، واننا كدة حنلبس كلنا شفيق او موسي. 

واصحابنا وحبايبنا الليبراليين اللي بيأيدوا موسي عمالين يقولولنا ان تصويتنا لحمدين حيفتت اصوات المدنيين، واننا كدة حنلبس كلنا مرسي او ابو الفتوح. 

نفسي تفهموا انتوا الاتنين اننا ثابتين علي مبدأ، واننا مستحيل ننسي شهدائنا ونصدق ان موسي مش من الفلول وانه حينصر الثورة، ولا نسكت علي إستغلال الدين وركوب المتأسلمين لثورتنا ونصدق ان ابو الفتوح مش من الإخوان وانه حينصر الدولة المدنية. 

وبناءً عليه وبكل حب وتقدير واحترام واخلاص فالمنطق والعقل والقلب كلهم بيقولوا انكم انتم اللي لازم تنضموا لصف حمدين صباحي، حتي لو له مساوئ من وجهة نظركم، لان تمسككم بمرشحكم بيفتت اصواتنا "كلنا" وحيلبسنا "جميعاً" في حيطة إسمها يا شفيق يا مرسي!