شعب عظيم - ثورة عظيمة

صباح العيش من غير ذل لكل محروم، والحرية من غير وصاية لكل مغلول، والكرامة من غير شرط لكل مقهور، والعدالة اللي يحس بيها كل مظلوم. صباح ثورة مصر العظيمة الاصلية الحقيقية، مش المركوبة الملعوب بيها المخطوفة الطائفية التعبيرية. صباح حق الشهيد في تحقيق حلمه ومحاكمة اللي غدر بيه ودبحه، مش التجارة بدمه واستغلال فقر اهله والتماحيك في صورته. صباح الامل في وطن حر يساعنا كلنا ويحبنا زي ما بنحبه، مش بلد أسير يهين اللي يحبه ويحب اللي يهينه. صباح شرع الله والشرعية وارادة الشعب والديمقراطية اللي بجد، مش الضحك علي الدقون واستغلال الفقر والجهل والسطو علي امة بصندوق من غير حق. صباح السلم والسلمية والسلام بقوة وعزة نفس وشرف، مش التسليم للعنف والاستسلام للزعر والارهاب من كتر الرعب والقرف. صباح الخير عليكم، صباح الحب بيننا، صباح الثبات، صباح الصمود، صباح الايمان بالله وبالوطن، صباح الثورة.

ايمانك ووطنيتك وكلامك علي العين والراس. بس النهاردة مش حيشفعلك اي حاجة انت مؤمن و مقتنع بيها مهماً كانت عظيمة, ومش حتنفعنا اياً من الشعارات والمباديء اللي انت ماشي تهتفت بيها, ومش حتنجحنا ولا كلمة من كل الحوارات والمناقشات التي انت خضتها وكل الستاتوسات والتويتات العظيمة اللي انت حشدت اللي حواليك بيها. كل ده مالوش اي لازمة لو النهاردة انت ما عملتش بالكلام ده، ونزلت وريت للدنيا كلها ولاي حد لسة مش فاهم، مين هو المصري العظيم بجد.

ايوة, المصري عظيم والشعب ده كله عظيم. ايوة وطني ومؤمن ومحترم وعظيم. احنا اكتر ناس بنهين نفسنا، وبنقول المصري كدة وهو كدة وحيفضل كدة، ونقعد نحبط نفسنا ونقول مافيش فايدة فينا، واحنا مش واخدين بالنا اننا فعلاً شعب عظيم. حتي لو كنا فوضويين، حتي لو كنا همجيين، حتي لو كنا مش منظمين، حتي لو كنا مش شيك، وحتي وحتي وحتي وحتي. احنا شعب عظيم لان بالرغم من كل اللي احنا فيه، احنا برضه من جوانا مؤمنين ومسالمين ومحترمين وبني آدمين حقيقيين. احنا مهماً فرق بيننا برضه ما بيهونش علينا بلدنا ولا حد من ولاد بلدنا. ومهما اختلفنا ولا حتي كرهنا، بنرجع نتصافي ونسامح ونحب زي واكتر من الاول بكلمة. احنا شعب عظيم قهر فرعون مستبد وواقف للي بعده بنفس الصلابة. احنا شعب عظيم ما بيتعبش من الكفاح ولا بيسكت علي الظلم, ومن ساعة ماعرف الطريق خلاص قرر ان عمر ماحد حيقهره تاني ولا يذله تاني ابداً مهماً كان التمن.

احنا شعب عظيم بشبابه اللي فاتحين صدرهم للموت وهما فرحانين وراضيين, اللي شايلين ثورة ضد الظلم علي كتافهم اللي لسة ماداقتش عدل, اللي بيحاربوا ببطولة ويهتفوا ويهزوا جبال في الشارع بس يروحوا يسمعوا زعيق امهم ومايفتحوش بقهم احتراماً واخلاقاً, وكل ده مع انهم شايفين العالم كله عايش ازاي وشايفين صور الشباب برة المتلمعة وعاملة فيها يا ارض تهدي ما عليكي ادي وهما يخافوا يعملوا للحظة واحدة بس واحد في الالف بس من اللي شباب مصر العظيمة كله بيعمله كل يوم وطول اليوم.

احنا شعب عظيم بستاته الجبارة اللي بتصون كرامة جوزها حتي وهو قاهرها وبتربي عيالها بحب وبتشيلهم في عينيها وتستحمل كل غتاتهم ولذاجتهم, وهي اصلاً ممشياهم كلهم وممشية بلد بحالها وشايلة اقتصاد وطن علي كتفها بوظيفتها او شغل بيتها او الاتنين سوا وكمان بتربية عيالها, وبرضه نازلة في وش الرصاص والغاز والطوب وبتحارب زي اعظم ابطال الاساطير, وترجع بالليل خالص تشيل المكياج و تغسل شعرها او توضب البيت وتغسل هدوم عيالها, علشان تنام وتصحي تاني يوم تبتدي كله تاني من جديد عادي عادي اكن اللي بتعمله ده اقل حاجة في الدنيا.

احنا شعب عظيم بجدوده وشيوخه اللي البلد ما ادتلهمش علي اد نيتهم واللي البلد ما كافئتهمش علي اخلاصهم واللي البلد ما داوتهمش لما مرضوا وتعبوا بس هما برضه مش بخلانين عليها ونازلين علي عكاز وفي كرسي وبيهتفوا بيها وبترابها علشان حبهم ليها ماتهزش لحظة مهما قست عليهم وعلشان عارفين ان اولادهم وولاد ولادهم لازم يفضلوا يحبوها زي ما هما مستعدين يموتوا في عشقها.

احنا شعب عظيم بضعفائه واقلياته اللي عمرهم ما اصطادوا في المية العكرة ولا حاولوا يخرقوا صفوفنا ولا استقووا بحد غير الله علشان ينصفهم, ونازلين النهاردة وكل يوم من غير غل ومن غير حقد, ومستعدين حتي يموتوا فدا واحد ممكن يكون هو اللي ظلمهم او قهرهم في يوم من الايام لانه من الاغلبية وكان موهوم ان هو صاحب البلد وهما ضيوف عليه.

احنا شعب عظيم برجالته اللي شايلين هموم بيتهم وولادهم واهلهم واصحابهم وبلدهم ووطنهم ودينهم ومستحملين غتاتة مديرهم وشريكهم وزميلهم, وبيكافحوا علشان يراعوا كل اللي حواليهم, وبرضه واقفين للظلم حتي لو علي دماغهم, وماشيين في الشارع بالعرض معليين صوتهم وبيجعجعوا ويشخطوا وعاملين فيها ميت وحش في بعض وسي السيد الجبار, وهما من جواهم قلب بفتة بيضة وحنية الجنين اللي مابيقواش اللي في حضن امه واهله واصحابه.

عظيم يا شعب. عظيمة يا بلد. قوم يا مصري وهز الوطن.