باطل - باطل - باطل

صباح الخير. علشان بس فيه ناس برضه صاحية تتكلم في مواد دستور وفي استفتاء:

امبارح بالليل جماعة وانصار محمد مرسي قتلوا مصريين. وبقية جماعته وانصاره بيستعدوا لقتل مصريين تانيين. ايوة. قدامنا لسة مواقع تانية كتيرة زي موقعة الخنزير بتاعة امبارح. هما بيعملو كدة ليه؟ بسيطة جداً. اللي خايف من الهلاك لازم يلوش. والملاكم المجروح ضربته بتبقي اقوي واعنف, لأنها ضربة استقتال للبقاء علي الحياة ونابعة من ضعف عميق وخوف مزلزل. مرسي سقطت شرعيته وهو عارف كدة, وبيقاوح وحيفضل يقاوح بكل الطرق لغاية ما يرغمنا علي الاستسلام لقبضته. حيضرب بجماعته, وحيحاول يبنج بخطاباته, وحيراوغ بمبادرات مساعدينه ونوابه, وحيشتت بمناورات حكومته واتباعه, وفي الآخر حيركع ويسجد قدامنا علي الهوا علشان يستجدي البسطاء منا ويسهينا. كل ده بالنص حيحصل في الايام الجاية وحتشوفوا بنفسكم. بس احب افكركم ان يوم لما جماعة مبارك ضربوا علينا نار ما سكتناش. واحب افكركم ان لما داسوا علينا بالبغال والجمال ماستسلمناش. ويوم ما طلع يعيط ويقول حاتدفن هنا ما تأثرناش. ويوم ما بعتولنا البلطجية ما تهزيناش. وان يوم لما هما عملوا كدة, فعلياً فعلياً هما اللي اسقطوا حكم مبارك.

اللي ماتوا امبارح زي اللي ماتوا اياميها بالظبط. ماحدش بيموت علشان اهله يقبضوا معاش شهري ولا مكافأة استثنائية. دي وسيلة الاخوان القذرة لاسكات اهالي ابطالنا, واللي ساعات بتنفع للأسف لأن شعبنا جعان ومحتاج. وماحدش بيموت برضه علشان يحسن شروط العبودية. اللي بيموت بيموت علشان مصمم يتحرر منها. اللي بيموت بيموت علشان حلم وهدف. اللي ماتوا في 25 يناير و28 يناير وموقعة الجمل ماتوا علشان صمموا انهم يفدوا حياتهم مقابل خلع ظالم وفاسد. واللي ماتوا في السنة اللي بعدها ماتوا علشان ينهوا حكم قيادة عسكرية مستبدة. واللي ماتوا امبارح يا حضرات ماماتوش علشان مش عاجبهم صياغة مادة ولا اتنين, ولا علشان يخلونا نعمل حملة توعية بلا. اللي ماتوا امبارح ارواحهم مهدت الطريق لمصر كلها للخلاص من القهر الجديد. اللي ماتوا امبارح ماتوا علشان رافضين ان حد يتحكم فيهم ويملي افكاره عليهم ولا بإسم تدين زائف ولا ديمقراطية معيوبة.

ارواح اللي ماتوا امبارح اغلي بكتير من اننا نزعل عليهم دقيقتين ولا نقول لا حول ولا قوة الا بالله والبقاء لله وخلاص, ونبتدي بعدها نتكلم في اعلان دستوري ولا تجميده ولا الغاءه. اللي ماتوا امبارح ماتوا علشان هما ما عرفوش يجيبوا حق اللي ماتوا قبلهم, فماتوا زيهم بجد مش بالهتافات. اللي ماتوا امبارح فدوا مصر بارواحهم, علشان احنا نفوق وننهض ونرفض القهر, حتي لو زحف علينا بالزيت والسكر والضحك علي عقول البسطاء, او بالمطابع الاميرية والصفقات القذرة مع العسكر والامريكان. اللي ماتوا امبارح بيقولولنا يا تشيلوا مرسي وتخلعوا جماعته, يا اما تبقوا بعتونا وخليتونا نموت علي الفاضي. وانا باقول حق اللي ماتوا امبارح وحلمهم في رقبتنا الي يوم الدين.

الدم بيجرح كل بني آدم, والموت بيوجع كل انسان, حتي لو مش في بدنه ولا في اهله. اللي عنده دم عمره ما يشوف الدم ولا يتهزش. واللي في قلبه رحمة عمره ما يشوف حد بيموت وما يحسش بقهرة اهله عليه. انما للأسف الشديد من غير دم الثورة دي عمرها ماكانت ولا قامت ولا نجحت. وامبارح الابطال دول فدوا نفسهم علشان يقولولنا كملوا المشوار - احنا ودمنا فدا الحرية وفدا مصر!!!!!
وطالما هما قالوا كدة, وطالما بقي فيه دم بيننا وبين مرسي, يبقي مش عاوز اسمع جبان واحد ييجي يقوللي حنعمل ايه في الاستفتاء. من دلوقتي الطريق واضح وصريح. وحتي لو اللي مسميين نفسهم قيادة سياسية تراجعوا علشان حساباتهم فهذا لا يعنيني. من اللحظة دي انا متأكد ان حكم المرشد حيسقط يعني حيسقط. محمد مرسي رئيس غير شرعي للبلاد, ونبقي شعب يستاهل كله يلبس طرح ويتضرب بالجزم لو ما خلصناش منه ومن جماعته, مهماً كان التمن ومهماً طالت المعركة.

باطل - باطل - باطل - باطل - باطل - باطل - باطل - باطل - باطل - لآخر يوم في عمري او لآخر لحظة في حكمهم, مش حابطل اقول باطل