خريطة التيار الطائفي في مصر

فيه ناس فاكرة ان حزب الحرية والعدالة هو الذراع السياسي الوحيد لجماعة الاخوان. 

ده مش صحيح. الاخوان لهم ٤ احزاب في مصر وكل واحد فيهم له دور. اولهم هو الحرية والعدالة، التنظيمي القيادي الحاكم. ثانيهم هو الوسط، السياسي الوسطي المحلل. ثالثهم هو البناء والتنمية، السلفي الاصولي الجهادي، ورابعهم هو مصر القوية، الشعبوي الثائر المعارض. كلهم بيمثلوا اوجه مختلفة من نفس الفكر وبيسعوا بطرق مختلفة لنفس الهدف، والاهم من كدة ان كل دول بيتبعوا اوامر مكتب الارشاد. 

الاخوان مش بالغباء انهم يسيبوا المعارضة الحقيقية تشم نفسها. هما اتعلموا كويس من اللي قبلهم وفهموا ان النظام مايقدرش يعيش من غير معارضة شكلية علشان مايبقاش شكلهم دكتاتوري قمعي مفضوح. الدكتاتور الذكي الناصح هو من يسمح بالرأي والرأي الآخر، طالما هو يملك مفاتيح اسكاته في اي لحظة.
 

حد يسألني ليه ما ذكرتش حزب النور، اقول لان حزب النور هو حليف سياسي مؤقت يتفق في الهدف ظاهرياَ ولكنه منافس سياسي مستقل يتبع اوامر سيادية ولا يتبع اوامر المرشد علي العكس الاربعة الآخرين. ولو خطة الشاطر نجحت في يوم من الايام اول ناس حيدبحهم في طريقه للتخلص من نظام مبارك الامني هما بتوع حزب النور.
 

حد يقوللي طب ايه لازمة الوسط دول اصلاً وعلي فكرة دول كانوا مقدمين علي حزب من زمان بعيد عن الاخوان؟ اقول بالظبط يا ناصح. دول كان دورهم الانشقاق الشكلي علشان يحاولوا يدخلوا اللعبة السياسية من الباب الخلفي في زمن المحظورة. ودلوقتي هما منافس برضه شكلي حالق دقنه خالص وده مطلوب.

حد يقوللي وليه الحرية والعدالة ما ينفردوش بالحكم ويجمعوا كل الاصوات في حتة واحدة بدل ما يدخلوا ناس زي الاصوليين بتوع الاصلاح والتنمية معاهم؟ اقول علشان هما اتعلموا من ايران ان ممكن اتنين مرشحين رئاسيين يحاربوا بعض ويشتموا بعض واحد معتدل والتاني متشدد طالما في الآخر الاتنين بيركعوا لخاميني (المرشد) ويبوسوا ايده علي الملأ او في الخفاء. وهنا اضافة صغيرة؛ هما دول اللي حيساهموا في خطة قمع حزب النور من منطلق فيه سلفيين طاهرين كويسين وسلفيين أمنجية وحشين.

حد يقوللي طب ليه ابو الفتوح ومصر القوية مش شايفهم معارضين حقيقيين؟ دول معانا وضد الدستور وكل حاجة؟ اقول لان عبد المنعم ابو الفتوح هو صاحب اهم دور في عملية كرتنة المعارضة، وهو من قد تم اختياره لتنفيذ الخطة البديلة اذا سقطت الخطة الرئيسية من الاول خالص. واديني باقولها من دلوقتي. ابو الفتوح حيهاجم الاخوان بشدة في الفترة اللي جاية وحيقول كلام جامد ضدهم، وفي نفس الوقت حيمهد لمبادرات ومناورات سياسية مغزاها اعطاء الشرعية لعملية النصب الاستفتائية بتاعة الشاطر. وبكدة يبقي بان علي انه فارس شجاع، وفي نفس الوقت معتدل وذكي ووطني ومش عاوز الدنيا تولع. ولو مرسي فشل لأن الشاطر لبسه في الحيط، فيبقي ابو الفتوح جاهز انه يكمل المسيرة والشاطر يرجع يستخبي وراه. الايام الجاية حتثبت لكم صحة الكلام ده وحتشوفوا مطبلتية كتير جداً من بتوع ابو الفتوح حيبتدوا يتصدروا المشهد ويزغرطوله علي اساس ان هو ده الكلام وهي دي المعارضة الحكيمة الرشيدة، مش الكفرة اياهم (من غير ما يقولوا الكلمة دي طبعاً). 

وفي النهاية شعبنا ده شعب جميل وطيب اويييييييييييي.
وسلملي علي الديمقراطية بطعم الملوخية وبتمويل السكر والزيت وحبوب القدرة الجنسية وربنا يخليلنا كلنا بابا خيرت اللي رابط المرشد من حبل وبيحركه زي عرايس الاراجوز المرخية!!!