كفاية ولولة من فضلك

مع كامل احترامي!!!
 
بس بدل ما حضرتك تقعد تصوت من نتيجة الاستفتاء اللي اكيد اي حد عاقل كان متوقعها, وتقعد تنظر ان الاحزاب لازم تتحرك وتنزل الشارع وتبتدي تشتغل بجد وبسرعة ومن دلوقتي علشان الانتخابات البرلمانية اللي جاية, وبدل ما تقعد برضه تنتقد وتردد ان كل الاحزاب منيلة وان جبهة الانقاذ معفنة وان الثورة هي الحل الوحيد, ارجوك تعرف ان اولاً الاحزاب عمر ما حتتبني مواقفك ولا تعمل بنصائحك ولا حيبقي ليها اي دور حقيقي ولا في السياسة ولا في الثورة طول ما حضرتك شخصياً مش عضو فيها, وان ثانياً ومع احترامي التام للحركات الثورية والنشطاء الفعليين الغير محزبين والنشطاء الالكترونيين المولولين فالاحزاب المشهرة الشرعية اصبحت للأسف هي الحل الوحيد لمواصلة المشوار سياسياً وثورياً.
 

بناءً عليه, ومن الآخر خالص, ومن غير لف ودوران, ومن غير لت وعجن عن هبوط اسهم التيار الطائفي الواضح والصريح في اعداد مؤيديه المتراجعة علي مدار السنة اللي فاتت, وعن قدرتنا الواضحة في التصدي لهم ثورياً وسياسياً, فإعلم يا صديقي الناقم علي ما نحن فيه اليوم, ان مصر فيها سبع احزاب "ثورية - وطنية - مدنية - فاعلة".
الاحزاب دي من "اليمين للشمال":
المصريين الاحرار - الجبهة الديمقراطية - الدستور - مصر الحرية - المصري الديمقراطي الاجتماعي - التيار الشعبي - التحالف الشعبي الاشتراكي.
 
كل دول عندهم مقرات في القاهرة الكبري, وفي كل مدن الجمهورية الكبري تقريباً, وموجودين فعلاً وبيشتغلوا بجد. وحتي لو هما لسة ما وصلوش للدرجة الفاعلة اللي احنا عايزينها, وحتي لو فيهم كلهم الانتهازي والوصولي والمتفزلك والغلس والغبي, فاسمحولي ان اجزم لكم بحكم معرفتي بيهم كلهم شخصياً علي كل مستوياتهم التنظيمية, ان كلهم نيتهم العامة صادقة واغلبية اعضائهم وقياداتهم هم من الوطنيين الشرفاء المحترمين, وهما في الآخر كلهم عايزين اللي انت عاوزه بشكل او بآخر, وكلهم محتاجين اعضاء فاعلين مشاركين نشطاء زي معاليك, علشان نتيجة الانتخابات اللي جاية وصدا المسيرات اللي جاية ترتقي كلها لمستوي توقعات حضرتك الطموحة.
 
فياريت ياريت ياريت, لو حضرتك تشوف بسرعة كدة ومن غير ما تضيع وقت كتير مين في الاحزاب دول هو الاقرب لك ولميولك ويتضمن من تثق فيهم اكتر, واتكل علي الله واختار, وروح امضي استمارة عضوية النهاردة قبل بكرة. ووانت واقف, إسأل علي فعاليات الحزب, وعلي لجانه, ولو عجبتك لجنة سجل نفسك فيها, وحط نفسك علي قايمة البريد الالكتروني بتاعة الحزب او بتاعة اللجنة, وخد اسم ورقم تليفون مسئول العمل الجماهيري في مدينتك او حتتك. ولو مالقيتش التجاوب اللي انت متوقعه او حسيت انك مش في المكان الصح, امشي علي طول وروح حزب تاني من السبعة واعمل الكلام ده. المهم ماتروحش بيتكم الا وانت عضو عامل في حزب سياسي مصري.
 
ومن اللحظة دي, اربط كل حاجة انت بتعملها بفعاليات الحزب ده. ادفع اشتراكك فيه. طلع كارنيه عضوية. احضر كل مؤتمر. شارك في كل المناقشات وكل القرارات, وحتي لو ماعجبككش راي الاغلبية ارتضي بيها, وشارك في اي انتخابات داخلية وخارجية.
 
مافيش حل تاني, مستقبل مصر في ايدك انت - مش في ايد البوب ولا حمدين ولا نجيب ولا حمزاوي - كفاية ولولة - يالا نشتغل بجد.
الثورة مستمرة!!!!