فين مندوب الاخوان في الرئاسة؟ فين ممثل المرشد في قصر الاتحادية؟ فين تعليقك يا مرسي علي موت الجنود المصريين؟ فين تعليماتك امبارح بالليل بخصوص عمليات الاغاثة والاسعاف اللي بدت واكنها متواطئة في تباطؤها وتخاذلها وكأنها تريد التأكد من ضمان اكبر عدد من الضحايا؟ فين منظومتك المؤمنة الطاهرة اللي بتراعي ربنا في الغلابة؟ فين الشريعة والإسلام في هذا الاسطنطاع الاسطوري وهذا الاستبطاء المفلس؟
فاكر كلامك لما كنت مندوب الجماعة في البرلمان من عشر سنين وقعدت تهوهو وتجعر علي ضحايا الاهمال وناديت بمحاكمة الحكومة كلها؟ ولو كنا احنا بنهاجم نظام مبارك معاك اياميها, تفتكر لازم نعمل ايه النهاردة؟ انت عارف ان اللي حصل امبارح هي سادس حادثة سكة حديد يموت فيها مصريين في 6 شهور من ساعة ما بقيت ريس؟ الفيوم - قها - اسيوط - قليوب - بدرشين الاولي (!!) - وبدرشين التانية امبارح. انت عارف ان ده اكتر من الحوادث اللي حصلت في آخر خمس سنين؟ انت عارف ان عدد الجنود المصريين اللي ماتوا في 6 شهور من ساعة ما بقيت ريس اكتر من اللي ماتوا في آخر عشر سنين؟ طب انت عارف ان من ساعة ما انت بقيت ريس المتظاهرين السلميين تم ضربهم وتعذيبهم وسحلهم وقنصهم وذبحهم؟ هو انت عارف ولا فاهم ولا فاكر ولا ناسي مبارك بيتحاكم ليه؟ واخيراً انت عارف ان مواطن مصري اخد حكم النهاردة بالسجن والجلد علشان كشف حقايق عن احتجاز مواطنين مصريين بدون محاكمات في السعودية اللي بترميلك الفتافيت؟ ايه رأيك في الموضوع ده؟
هو انت فاكر ان احنا اسقطنا نظام مبارك وحاكمناه علي ايه؟ علشان مش من جماعتك؟ ولا علشان بيحلق دقنه؟ ولا علشان ما بيقيمش الصلاة جماعة مع ضيوف القصر؟ وفاكرنا كرهناه ليه بعد حوادث القطارات والعبارة ومسلسلات اهانة المصريين في الخارج؟ علشان الناس كانت بتموت او بتتهان؟ ابداً. ولا علشان كنا فاكرينه هو قبطان العبارة؟ لا يا سيدي. احنا كرهنا مبارك علشان خلي تمن المصري رخيص. احنا كنا ممكن نتقبل اي حاجة من مبارك الا انه يسفه من تمن البني آدم المصري مهماً كان بسيط وغلبان. احنا اسقطنا مبارك في قلوبنا قبل اسقاط نظامه مش علشان الناس كانت بتموت ولكن علشان اسلوبه في تجاهل موتهم وفي التقاعس علي بذل الجهد الكافي لمنع تكرار المآسي. ومع كل ذلك, بذمتك عمرك سمعت احمد عز او زكريا عزمي او حتي ادني خلق الله صفوت الشريف طالعين بعد حادثة زي بتاعة امبارح بالليل يقولوا ان الاعلام بيهول واننا لازم نهني الرئيس زي ما عمل واحد من الخنازير اللي بيطبلولك, واللي خلي واحد ثوري حتي النخاع زيي يقتنع ان ثورتنا شالت فاسدين موكوسين علشان تجيب اللي افسد واوكس منهم؟
يا مرسي انت ربنا كارمك بشعب طيب بينسي بسرعة. بس ربنا باليك برضه بناس زي العبد لله ما بتنساش ومش ناوية تنسي ولا ناوية تسكت ابداً.
انا نازل يوم 25 يناير علشان اسقاطك اصبح ضرورة حتي يعيش المصريين.
مرسي اخرجه الشعب من السجن بعد ارادة الله وجاء به الشعب الى الكرسي ولن يستطيع ان ينزعه من كرسي جلس عليه الا الشعب برضه لذلك اعمل معه على انجاح مصر ولا تكن مع من يصارخ ضده وكانه استلم مصر جنه ويريدان يفسدها ,,, استلم مصر بلد منهارويسرق ليل نهار وتريده ان يصلح مافسده مبارك في 30 سنه خلال عدة اشهر ,,,مالكم كيف تحكمون!!!!!!!!!!!!!!!!!! سبحان الله
ReplyDeleteمرسي اخرجه بلطجية وميليشيات الاخوان وحماس من السجن وليس "الشعب" لان الشعب ساعتها ماكانش بيهاجم اقسام او سجون ولكنه كان يثور علي النظام في الميادين
ReplyDeleteثم انني لم ارضي بمبارك كما لا ارضي بمرسي ولا اري فرق بالمرة - في الحالتين كانت هناك انتحابات واستفتاءات بدرجات متفاوتة من الانتهاكات والتزوير - هذا لا يخصني
ما يخصني ان مرسي اثبت في 6 شهور ان ما يهمه ليس مصر ولا المصريين واثبت بافعاله الي الآن انه لن يحدصث اي تغيير الي الافضل وهو ما ناشدناه عندما قمنا بثورة وهذا لا يحتاج لاعوام حتي يراه المثقف المحايد المتعلم وكل ما يهمه هو سطوة جماعته وهذا ما لن يقبله المصريين ابداً حتي لو كان له من الاتباع من لا يتفقوا مع ما اقوله
اما مالكم كيف تحكمون فهي آية فسرها بعض الفقهاء علي نصرة المسلم حتي لو أخطأ وهذا خلط كبير واصلاً غير وارد هنا لاننا لم ندعو لحاكم آخر صهيوني او كافر
تحياتي وشكراً علي التعليق